كلنا هانروح ننتخب إن شاء الله و نعطي صوتنا لمن يستحقه.

اللي هم مش فلول.

و اللي هم ما باعوناش في الميدان. 🙂

موظف بلجنة إنتخابية في منظقة ريفية في السودان يقرأ الرقم المسلسل على الصندوق

بس واجبنا كمان أن نراقب ما يحدث بداخل اللجان, و بما أننا كمستخدمي الإعلام الإجتماعي فتحت إيدنا أداة مهمة ومفيدة جدا.

فيما يلي بعض النصائح لنا كناخبين و مراقبين غير رسميين، من تجربتي كناخب في مصر (أيوة انتخبت في 2010!) و كمراقب دولي للإنتخابات مرتان (في شمال و جنوب السودان تحديدا للي عايز يعرف). انا بأفترض أننا ماشيين بالقواعد العادية. لا أدعي على الإطلاق أني خبير في الأمر. و لو أنا كاتب حاجة غلط أرجوكم أرجوكم صلحوني – تعليق تحت أو إيميل و هاصلحها على طول.

طيب. النصيحة الأساسية ببساطة شديدة هي فتح عينيك، لاحظ ما حولك.

هل اللجنة إلتزمت بموعدها؟ ولا فتحت أو قفلت بدري أو متأخر؟

لو كنت موجود وقت الفتح أو القفل، هل ده يتم بحضور مراقبين رسميين؟ (معاهم تصريح يعني مش زينا)

هل الموظف بيشوف فعلا أثبات الشخصية؟

هل الموظف بيشوف على إيدين الناس إذا كان فيه حبر (يعني صوتوا بالفعل) أم لا؟

هل أسماء الناخبين تسجل أو تشطب من القائمة؟

هل الموظف اللي بيدي الورقة للمواطنين يشرح لهم بإختصار كيفية الإنتخاب؟

هل الناس بتكتب في الورقة وراء ستار أو ساتر و بعدين تضع الورقة في الصندوق من غير ما حد غيرهم يشوف ورقتهم؟

هل الصندوق مقفول كويس؟ المفروض الغطاء يكون مثبت بأقفال بلاستيكية مرقمة.

هل الموظف بيحط صباع الناس في الحبر فعلا؟ هل بيحطه كويس ولا نقطة وهاتتمسح بمنديل مبلول؟ (ولا مفيس حبر من أصله؟)

لو كنت موجود ساعة قفل اللجنة: هل الصندوق بيتقفل بحضور مراقبين؟ هل يتم وضعه (بحضور مراقبين مرة ثانية) في مكان امن و عليه حراسة؟

تويتر

تويتر يسمح لنا بنقل الأخبار بسرعة.

اكتب. افضح. المهم لما تكتب:

–          معلومات مؤكدة. لا تنشر إشاعات

–          إستحدم هاش تاج عشان الناس تعرف تتابعك. فكرة الهاش تاج هي أن أي كلمة يوضع أمامها رمز الشباك # تتحول تلقائيا إلى كلمة مفهرسة تقدر تضغط عليها تجيبلك كل التويتات (أو “التغريدات”) اللي بتستخدم نفس الهاش تاج.

–          أقترح إستخدام #EgyElections  لــــــكـــــل ما تكتب عن الإنتخابات. ده يمكن أهم جاجة في الصفحة دي كلها!

–          مهم تكتب فــــيــــن ده بيحصل. ضع هاش تاج بإسم المنطقة أو الحي (مثال: #Heliopolis  أو #Cairo4th عشان مصر الجديدة أو الدائرة الرابعة).

–          إكتب كمان إسم و رقم اللجنة. (مثال: مدرسة صلاح الدين، 791).

–          لو جهازك يسمح : شغل إمكانية البصمة الجغرافية: Geotagging –  عشان ده بيضع خريطة مع التويتة.

التصوير

لو عايز تصور إستأذن من القاضي أو وكيل النيابة أن تقف بعض الوقت لمراقبة العملية الإنتخابية. على الأغلب لو طلبت بأدب و إبتسامة هايسمحلك – في الإستفتاء وكيل النيابة اللي كان بيراقب سابني أصور براحتي.

على الأغلب مش هاتقدر تصور أي تزوير بأي حال, بس تقدر تثبت تجاوزات مهمة مثل:

وجود دعاية داخل اللجنة الإنتخابية (بما في ذلك حوش المدرسة، مش بس الغرفة اللي فيها الصندوق)

–          أن الناس مش بتملأ الإستمارة  خلف الساتر

–          أن موظفي اللجنة بيملأوا الإستمارة عن كبار السن والأميين (لاحظ أنه لو الناخب طلب مساعدة يبقى يصح أن رئيس اللجنة يساعده فعلا)

–          أن الصناديق مش مقفولة بالشكل الموصوف أعلاه

–  وهكذا.

و إرفع الصور فورا على الإنترنت. انا شخصيا إذا صورت حاجة هاحطها على تويتر و المدونة.

برضه لا تنس وضع الهاش تاج.

الإبلاغ

من الاخر لا يمكن الإعتماد على الدولة في إنها تحقق في التجاوزات الا إذا كانت التجاوزات موثقة و كثيرة. و دي أهمية أننا نكتب و نوثق حتى لو مش واضح ايه أهمية ده. لازم نفضحهم من الاخر يعني.

بداخل اللجنة: نص الموظفين مش عارفين الإجراءات كويس. بس بعضهم هايحاول يغش. و بعضهم بيشتغل لصالح أحزاب.

القاضي بقا بيحاول يتابع و ممكن تكون الأحداث واخداه و مش ملاحق.

لو عايز تبلغ القاضي اللي قاعد ممكن – بشكل حويط و مؤدب. يعني اسال “هو الناس ممكن تصوت كدة برة الستارة؟” او حاجة بالشكل ده. الرجل (أو السيدة) عايز الدنيا تمشي صح بس مش لاحق. فده يمكن ينفع.

–          أرقام تليفونات:

جالي أرقام تليفونات عشان نبلغ عن تجاوزات أو أخطاء. هم:

المنظمة المصرية لحقوق الإنسان: الخط الساخن 08004440800

مجموعة مراقبة:  01017730661/60/59

للإبلاغ عن أحداث عنف: إتصل بمركز النديم: 0109952374 – 0100552793 – 01005459196

لو حد عنده ارقام إضافية يا ريت تبعثوهالي.

و ختاما

يسقط يسقط حكم العسكر!

By | 2017-09-08T06:15:56+00:00 November 27th, 2011|Uncategorized|